Recensións

‘Os nenos da varíola’ (Galaxia) acada a segunda edición


María Solar vén de publicar unha historia que, aínda que tratada en parte por outros autores, ten, coma sempre, o seu selo persoal. O dominio do tempo narrativo e o tratamento dos personaxes, cheos de autenticidade, son dous dos factores que contribúen a facer de Os nenos da varíola (que chega hoxe á segunda edición) unha narración viva, emocionante, que ten moito de homenaxe e de memoria. Este libro conta como naceu a idea da Real Expedición Filantrópica da Vacina, máis que a expedición en si mesma. É, sobre todo, unha novela que describe como se desenvolve en Galicia a vida dos nenos orfos, como eran os hospicios, como era aquela vida inxusta na que habitaba a enfermidade, a pobreza e a fame. 22 deses nenos, de Coruña, Santiago e Madrid, serán os heroes que transporten a vacina da varíola a América, in vivo, brazo a brazo, di María Solar, sen romper a cadea. Sorteando a morte e a tempestade. Balmis recibirá as honras á súa volta, aínda que foi desposuído por José Bonaparte. Pero as figuras de Salvany e de Isabel Zendal Gómez (Agrela, Ordes), primeira enfermeira internacional, foron tamén moi importantes. Asemade, cómpre sinalar a relevancia na historia dun médico ilustrado, Posse Roybanes, e do pequeno Ezequiel… Esta é unha historia, fermosa e dura, que todos deberiamos ler. A historia emocionante daqueles heroes verdadeiros dos inicios do século XIX: os 22 nenos da varíola. Os protagonistas dunha das grandes fazañas médicas da humanidade. / J.M. GIRÁLDEZ


Leave a Comment

Tu dirección de correo electrónico no será publicada. Los campos obligatorios están marcados con *